130 PULIS POSITIBO SA DROGA

SA halos 100,000 miyembro ng Philippine National Police (PNP), 130 sa kanila ang nagpositibo sa paggamit ng droga.
Nabatid sa PNP na nasa kabuuang 99,598 police officers ang sumalang sa drug tests sa buong bansa, kabilang ang mga may ranggong police major o chief inspector.
Hindi muna pinangalanan ni Chief Supt. Emmanuel Aranas, director ng PNP Crime Laboratory, ang mga opisyal nitong nagpositibo sa illegal drug use pero kabilang umano sa kanila ang pulis sa Meycauan, Bulacan na natagpuang patay at may cardboard pa na nagsasabing siya ay "pusher."
May ilang babaeng pulis din umano ang nagpositibo bagamat hindi na binanggit ni Aranas ang bilang ng mga ito.
Nagpadala na umano ang PNP ng notice o abiso sa mga pulis na nagpositibo sa paggamit ng ipinagbabawal na gamot.
Sinabi ni Aranas na ipauubaya na kay PNP Chief Dir. Gen. Ronald "Bato" dela Rosa kung ano ang gagawin sa mga nagpositibo sa illegal drugs bagamat otomatiko ring mahaharap ang mga ito sa kasong administratibo.
Isinagawa ng PNP ang random drugtests upang malinis ang hanay nito.

41 PRESO GRUMADWEYT

NAGTAPOS sa elementarya at high school ang may 41 inmates sa Quezon City Jail Male Dorm kaugnay sa programa ng Alternative Learning System ng Department of Education ngayong taong 2015-2016.
Isinagawa ang graduation rites sa loob mismo ng Quezon City Jail.
Ang naturang programa ay inilunsad sa QCJ-MD apat na taon na ang nakararaan kaagapay ang DepEd at pinamahalaan ng mga mobile teacher at Welfare Development Unit kung saan binabase sa facilitating  modular ang mga isinasagawang pag-aaral o basehan sa elementary at secondary level.
Layunin ng Alternative Learning System Program na mabigyan ng pagkakataon ang bawat inmates na makapag-aral at makapagtapos ng basic education kahit sila ay nakapiit habang hinihintay ang hatol sa kanila ng hukuman.

Pokemon Go bawal sa Olongapo

Mahigpit na ipinagbabawal ni Olangapo City Mayor Rolen Paulino ang paglalaro ng nauuso ngayong mobile application na Pokemon Go.

Paliwanag ng alkalde, mapanganib para sa mga menor de edad ang paglalaro ng Pokemon Go lalo na kung  masama ang panahon.

Itutulak ni Paulino sa konseho ng lungsod ang pagtitibay ng ordinansa para hulihin ang mga kabataang naglalaro ng Pokemon Go kapag suspendido ang klase sa mga eskuwelahan.

Sinabi ng alkalde na kaya siya nagdedesisyon na kanselahin ang klase sa lungsod kapag may matinding pag-ulan o bagyo ay upang tiyakin na ligtas ang mga kabataan sa kani-kanilang tahanan.

Subalit hindi na aniya makatwiran na tila nakukunsinti ang mga kabataan sa paglalaro ng Pokemon Go sa kalsada kapag suspendido ang klase.

Sa paglalaro ng Pokemon Go, kinakailangang gumalaw o maglakad ang manlalaro na bitbit ang kanyang mobile phone.

Death toll sa habagat 14 na

UMAKYAT na sa labing-apat ang mga nasawi dahil sa matinding ulan na dulot ng hanging habagat sa Pilipinas.
Ayon sa National Disaster Risk Reduction and Management Council (NDRRMC), nadagdag sa bilang ang hindi pa nakikilalang biktima ng pagkalunod sa Palawan.
Nangingisda umano sa maalong bahagi ng dagat sa Barangay Calasaguen sa Brooke’s Point ang biktima bago ito naiulat na nawawala.
Samantala, walong indibidwal pa ang nawawala habang anim ang sugatan bunsod pa rin ng hanging habagat.
Tinatayang 17,896 na indibidwal naman ang nananatili sa mga evacuation center.
Aabot din sa 262,271 tao ang naapektuhan ng masamang panahon sa Calabarzon, Western Visayas, National Capital Region at Cordillera Administrative Region.
Iniulat ng NDRNMMC na may 24 kalsada ang hindi madaanan pansamantala sa Abra, Benguet, Ifugao, Kalinga at La Union.